Һәр эшнең әҗере бар

Сәләмләшүгә динебездә зур әһәмият бирелә. Мәсәлән, Пәйгамбәрдән ﷺ: «Бер-берсе белән күрешкән ике кешенең кайсысы беренче булып сәлам бирә?» ‒ дип сораганнар. «Аллаһка якынрагы», ‒ дип җавап биргән Пәйгамбәребез ﷺ.

«Әссәләмү галәйкүм» дигән өчен – 10, «вә рахмәтуллаһи» дип өстәгән өчен – 20, «Әссәләмү галәйкүм вә рахмәтуллаһи вә бәрәкәтүһ» дип сәлам биргән өчен исә 30 савап языла, ди.

Мәгънәсе: «Сезгә сәлам, Аллаһның рәхмәте һәм бәрәкәте булсын!»

Бер-берсе белән кул бирешеп күрешкән ике мөселман хушлашып аерылганга кадәр аларның кече гөнаһлары бер-бер артлы җуела, ди.

«Үзендә күрергә теләгән яхшылыкны диндәге кардәшенә дә тели башламыйча, берегезнең дә иманы камил булмас», ‒ диелә хәдистә.

«Кемне яратасың, ахирәттә шуның белән бергә булачаксың», ‒ дигән Аллаһ рәсүле ﷺ. Бөтен сәхабәләр дә иң ныгы шушы хәдискә куанган. Чөнки Пәйгамбәребезне ﷺ нык яратканнар һәм киләсе тормышта да аның янында булырга теләгәннәр.

Бер-берсен Аллаһ ризалыгы өчен яратучыларга ахирәттә нурдан ясалган мөнбәрлар әзерләп куелачак, аларга хәтта пәйгамбәрләр һәм шәһитләр көнләшеп һәм сокланып багачак, ди.

Бер мөселман икенче мөселман ишетмәгәндә аның өчен дога кылса, догасы җавапсыз калмаячак, ди. Кеше берәр дин кардәше өчен Аллаһ Тәгаләгә дога кылса, аңа беркетелгән фәрештә: «Амин, сиңа дә шулай булсын!» ‒ дип әйтә.

Бөтен мөэмин ирләрне һәм мөэминә хатыннарны гафу итүен сорап Аллаһка дога кылган кешегә һәр мөэмин ир һәм һәр мөэминә хатын өчен берәр савап язылачак, диелә.

«Юлда комачау булып яткан агачны читкә алып ташлаучы кешенең Оҗмахта шул агач күләгәсендә утырганын күрдем», ‒ дигән Аллаһ рәсүле ﷺ.

Аллаһ рәсүле ﷺ: «Үзе хаклы булса да, бәхәсләшүне калдырган кешегә Җәннәт читеннән йорт вәгъдә итәм. Шаярткан чакта да алдашмаган кешегә Җәннәт уртасыннан йорт вәгъдә итәм», ‒ дигән.

Ачуын тышка чыгарырга мөмкинлеге булып та аны тыя алган кешене Кыямәт көнендә Аллаһ Тәгалә бөтен мәхлуклар алдына чакырып чыгарачак һәм аңа җаны теләгән хур кызын сайлап алырга мөмкинлек бирәчәк, ди.

Үлгәннән соң берәрсе хакында яхшы сөйләсәләр, аның өчен Оҗмах тиешле булыр, начар сөйләсәләр, Тәмуг тиешле булыр, чөнки кешеләр – Аллаһның җирдәге шаһитлары, диелә хәдистә.

Дин кардәшләренә ярдәм итеп яшәгән мөселманның үзенә Аллаһ Тәгалә ярдәм итеп торыр, ди.