Барлык яңалыклар
Иман нуры
27 сентябрь 2019, 13:10

Кем ул бернәрсәсез кеше?

Без бөлгенлеккә төшүдән уттан курыккандай куркабыз. Гомеребезнең күп өлешен диярлек матди әйберләребезне, малыбызны, акчабызны арттырырга тырышып үткәрәбез. Үзебезгә җиткәндәй булса, балалар, аннан оныклар өчен тырыша башлыйбыз. Аллаһ сакласын, моның өчен алдашырга, урлашырга, сугышырга да мөмкинбез. Дин күзлегенннән караганда, менә шулар безне чын бөлгенлеккә төшерергә мөмкин дә...

Аллаһ рәсүле (саллаллаһу галәйһи вә сәлләм): «Сез беләсезме, кем ул мөфлис (бөлгенлеккә төшүче)?» – дип сорый. «Кемнең дирхәме дә (акчасы да), әйбере дә юк, шул бөлгенлеккә төшүче», – дип җаваплыйлар кешеләр. «Минем өммәтемнең мөфлисе – Кыямәт көнендә намазлары, уразасы, зәкатьләре белән килеп басып та, әмма бу дөньяда ул кемгәдер начар сүз әйткән, кемнеңдер гайбәтен сөйләгән, кемнеңдер малын ашаган, кемнеңдер канын агызган, кемгәдер суккан булып чыгып, аның яхшы гамәлләре шул зыян күрүчеләргә таратылып бирелгән, ә инде яхшы гамәлләре барлык күрсәткән зыяннарын капларга җитмәсә, шул җәберсетелгән кешеләрнең гөнаһлы гамәлләре аңа йөкләтелеп, Утка ыргытылган кеше», – ди Пәйгамбәр галәйһиссәләм (Мөслим, Тирмизи хәдис җыентыкларыннан).