МЕҢ АЙДАН ХӘЕРЛЕ ТӨН ЯКЫНЛАША

Ураза тоткан кешеләр Рамазан аенда ахыргы ун кичнең һәрберсенә игътибарлы булалар, чөнки алар арасында Кадер киче бар. Аның билгеләре: ул кич нурлы булыр, бик салкын булмас, җиләс кенә булыр, йолдыз атылмас. Бу кичә мең айдан да хәерлерәк, бу кичәдә кылынган гыйбадәтнең савабы мең ай кылган гыйбадәттән артыграк. Бу кичәдә фәрештәләрнең саны җирдә булган вак ташлардан да күбрәк булыр. Бу кодрәтле төндә Коръән Кәрим төшерелгән. Бу төндә адәм балаларының алдагы бер елга язмышлары билгеләнер. Бу төн — таңга кадәр иминлек төне. Бу кичтә ураза хәлендәге кеше, уяу торып, намаз укып, Аллаһыдан өмет итеп сораса, Аллаһы Тәгалә аның догаларын кабул итәр, гөнаһларын гафу итәр.

КАДЕР КИЧӘСЕ

Йолдыз иләгеннән җиргә

Сирпелеп сихәт ява.

Кадер кичәседер бүген –

Сулап туймаслык һава.

Агачлар да тып-тын тора,

Әйтерсең, намаз кыла.

Сулар да саф, татлы бүген –

Агалар салмак кына.

Бар тереклек Тәңресенә

Мәдхия җырлаганда,

Фәрештәләр җиргә төшеп

Догалар тыңлаганда

Сокланудан илһамланып,

Мең мәшәкатьләр аша

Уяу күңел изгелеккә,

Мәңгелеккә тоташа...

(Фатыйма ГАЛИЕВА шигыре.)

Рамазан аеның соңгы ун көненең берсендә КАДЕР ТӨНЕ яшеренгән. Хәдисләрдә «Аны (ягъни Кадер төнен) рамазанның соңгы ун көнлегендә эзләгез», диелә. Ә бер хәдистә «Соңгы ун көнлекнең так (нечетный) көннәрендә», дигән өстәмә китерелә.

Кадер төне ни өчен кадерле соң?

Аллаһы Тәгалә бу төндә Коръән-Кәримне иңдергән. Бу төн мең айдан да хәерлерәк. Бу төндә изгелек, бәрәкәт һәм рәхмәт белән фәрештәләр төшә. Бу төн җәзалардан һәм газаплардан имин. Бу төнне һәр кешегә бер еллык тәкъдире (язмышы) билгеләнер.

Бу төнне бәхетлеләрнең гөнаһлары гафу кылыныр. Әл-Бохари һәм Мөслимнең хәдис җыентыкларында әйтелүенчә, «Кем бу төнне әҗер-савапларга өмет белән гыйбадәттә үткәрә, шуның элеккеге гөнаһ эшләре ярлыканыр».

Кадер киче хакында КОРЪӘНдә аерым сүрә бар.

"КАДЕР (КАДЕР КИЧ)" СҮРӘСЕ:

Бисмил-ләһир-рахмәнир-рахим. Тәхкыйк Без Коръәнне иңдердек кадер кичендә. Сиңа кадер кичнең Шәрафәтен вә аның хикмәтен нәрсә белдерде? Кадер киче, мең айдан да хәерлерәк савабы, мең ай кылган гыйбадәттән артыграктыр. Кадер кичендә Җәбраил һәм башка фәрештәләр иңәрләр Раббыларының теләге белән һәр кешегә билгеләнгән бер еллык тәкъдир белән. Кадер кичендә намаз, Коръән укып ураза тоткан мөэминнәргә фәрештәләр Аллаһудан сәлам укырлар. Кадер киченең дәвамы кояш баеганнан башлап таң атканга чаклыдыр. (Коръән рамазан аенда кадер кичендә дөнья күгенә Җәбраил фәрештәгә иңдерелде. Аннары Җәбраил галәйһиссәләм кирәк саен аять-аять пәйгамбәргә китереп торды.) (Ногмани тәфсиреннән.)

"ДУХАН (ТӨТЕН)" СҮРӘСЕнең 3-6нчы аятьләрендә дә Кадер кичәсе турында әйтелә:

"Без ул Коръәнне мөбарәк кадер кичәсендә иңдердек, Без Коръән белән имансызларны куркытучы булдык. Ул кадер кичәсендә киләсе елга хәтле булачак эшләр хөкем ителер, ягъни тумак, үлмәк, ризык һәм дөньядагы башка булачак вакыйгалар тәгаен ителер. Һәр әмер хикмәт буенча Безнең хозурыбызда хасил булган хәлдә, Без ул көндә мөэминнәргә фәрештәләр җибәрер булдык, мөэминнәргә Раббыңнан рәхмәт булган хәлдә чөнки, Ул – Аллаһ бәндәләренең хәлләрен белер, сүзләрен ишетер".

Бу төннең аерым билгеләре бар. Бик тыныч, җилсез, болытсыз булыр, йолдыз да атылмас, агачларның яфраклары да селкенмәс, ә иртән кояш тулган ай кебек, нурсыз күтәрелер, диелә.

Читайте нас:

Баш мөхәррир: Фаил Камил улы Фәтхетдинов

Телефон

8(347)272-67-48

Электрон почта

[email protected]

Адресы

450079, Республика Башкортостан, г. Уфа, ул. 50 летия Октября, 13, каб. 612

Реклама хезмәте

8(347) 272-62-27

Редакция

8(347) 272-67-48

Кабул итү бүлмәсе

8(347)272-13-61

Хезмәттәшлек

8(347) 272-67-48

Кадрлар бүлеге

8(347) 272-13-61