"Илһамлы мизгел" конкурсына. Зөлфия Сафина. Нәсерләр.

"Илһамлы мизгел" конкурсынаЗөлфия СафинаНәсерләрЯлгыз миләшӘниләрнең уңып пешкән икмәге төсле туп-тулы ай бакча буенда үскән миләш агачын төнге караңгылыктан азат иткән. Алтын көз кызыллыгына чумган яфраклар арасыннан оялып кына миләш тәлгәшләре күренә. Шушы тынлык пәрдәсен бер читкә тартып куеп, баян моңы ишетелде. Яшьләр килә иде... Миләш агачы яшь чагында да шундый нечкә күңелле, ярсу иде алар. Заманалар үзгәрә, ә яшьләр һаман элеккечә... Картайганнары урынына юеш борын малайлар, алмадай кызлар үсеп җитеп кенә тора. Алар, үтеп барышлый миләшне моңлы җырлары белән сәламләделәр дә, туктап, койма буендагы нарат бүрәнәсенә утырыштылар. Кемдер өздереп баян уйнап җибәрде, аңа челтерәп аккан чишмә тавышы белән яшьләр кушылды. Мәхәббәт турында җырлый алар. ...Һәм кинәт хатирәләр төпкеленнән мәһабәт нарат агачы пәйда булды. Аларның икесен дә бер үк вакытта шушы бакчага утырткан иделәр. Һәм миләш кызы белән нарат, бер-берсеннән калышмаска тырышып, ярыша-ярыша үсеп буй җиттеләр. Зәңгәр иртәләрдә икесен дә бер мизгелдә таң сандугачлары сайрап уята иде, икесен дә.... Ә хәзер инде миләш агачы ялгыз калды. Электр баганасы утыртырга комачаулай дип, наратны үткән ел төптән үк кисеп аттылар. ...Ә яшьләр миләшнең иске яраларын кузгатып, курыкмыйча, җырлый бирәләр. Акрын гына төнге җил исеп куйды. Әйтерсең лә ул күзгә күренмәс йомшак канатлары белән миләшнең һәр бер яфрагын сыйпап иркәләде. Һәрбер миләш бөртегендәге яшь тамчыларын сөртеп алды. Яшьләрне тыңлап юанды миләш...