Яшəр өчен аша!

КИРƏК БУЛАЧАК (3 порциягə):

– 150 грамм карабодай ярмасы;

– 300 грамм тавык филесы (сөяксез ит);

– 150 грамм шампиньон;

– 1 кишер;

– 50 миллилитр каймак (10 процент майлылыктагы);

– 0,75 бал калагы тоз;

– 1 бал калагы тавык тəмлəткече;

– 30-45 миллилитр (2-3 аш кашыгы) үсемлек мае;

– 1-2 ботак укроп (өстəлгə куйганда).

Шампиньоннарны чистартабыз, эре кисəклəргə турыйбыз. Тирəн төпле табада үсемлек маен җылытабыз да гөмбəлəребезне шунда салабыз. Шампиньоннарны уртача утта 5-6 минут буена əйлəндерə-əйлəндерə кыздырабыз. Гөмбəлəребез кыза торсын, ə без бу вакытта кишерне юабыз, шакмаклап турыйбыз, тавык филесын зур булмаган, 2 сантиметрлы кубиклар рəвешендə ваклыйбыз. Тавык итен гөмбə янына – табага озатабыз, 2-3 минутлап (итнең төсе үзгəргəнче) бергə пешерəбез. Кишерне шулай ук табага салабыз. Тагын 4 минут, кишер йомшарганчы пешерəбез.

Карабодай ярмасын агып торган суда яхшы итеп юабыз да табага салабыз. Шунда ук тоз белəн тавык тəмлəткечен өстибез. Ярма майлансын өчен, 1-2 минут буена бутыйбутый кыздырабыз. Аннары табага каймак салабыз. 300 миллилитр су өстибез, таба эчендəге ризыкны кайнатабыз. Талгын гына утка куябыз да, карабодайны капкач астында 10-12 минут пешерəбез. Сыеклык парга əйлəнеп, ярмага сеңгəч, утны сүндерəбез дə, табаның өстен каплап плитəдə тагын 5-10 минутка калдырабыз.

Укропны вак итеп турап салабыз. Ризык бик сусыл һəм тəмле килеп чыга, аның хуш ислəре аппетитны кузгата. Ботка пешеп таралмый, киресенчə, йомшара, əмма формасын саклый.

Фото: freepik.