Яшьләр академиядә социаль проектлауны үзләштерәчәк

Яшьләр эшләре буенча федераль агентлык Росмолодежь академиясе базасында масштаблы белем бирү онлайн-программасын эшләтеп җибәрде. Укыту 14 яшьтән 35 яшькә кадәрге яшьләргә бушлай социаль проектлауны үзләштерергә һәм грант конкурсына гаризалар әзерләргә ярдәм итәчәк. Росмолодежь башлыгы Григорий Гуров сүзләренә караганда, ел саен конкурста 80 меңнән артык кеше катнаша.

– Грант – ул финанс ярдәме генә түгел, ә зур җаваплылык та. Автор сораулар белән берүзе калмасын өчен, без комплекслы ярдәм системасы төзибез, – дип ассызыклады Росмолодежь башлыгы Григорий Гуров бу хакта.

Программа ике өлештән тора. Башлангыч курс биш тематик блокны үз эченә алган: идея эзләүдән һәм максатчан аудиторияне билгеләүдән команда формалаштыруга һәм документация әзерләүгә кадәр. Уку нәтиҗәләре буенча катнашучылар сертификат алалар. Алдагы өлешкә беренче этапны узганнан соң ирешеп була һәм ул тәҗрибәле проект лидерлары өчен каралган. Аның нәтиҗәсендә  финанс моделе, масштаблау стратегиясе һәм юридик документы булдырыла.

Моннан тыш, гамәлдәге грант алучылар өчен “Хисап мәктәбе” эшли башлады. Экспертлар җиңүчеләрне документлар белән эшләргә өйрәтәчәк.

Росмолодежь конкурсының икенче сезонында катнашуга гаризалар кабул ителә. Грантлар алу өчен гаризалар 2026 елның 15 сентябренә кадәр бирелергә мөмкин. Катнашучылар үз инициативаларын тормышка ашыру өчен 1 миллион сумга кадәр акча алырга мөмкин. Конкурс Русия Президенты Владимир Путин башлангычында тормышка ашырыла торган “Яшьләр һәм балалар” гомумдәүләт  проекты кысаларында үткәрелә.

Фото: национальныепроекты.рф