"Эпосны саклап калу өчен барысын да эшләрбез»

Башкортстан республикасында бүген икенче тапкыр «Урал-батыр» башкорт халык эпосы көнен билгелиләр. Борынгы сәнгать һәм әдәбият истәлеге булып саналган, авыз иҗатының уникаль әсәре төбәкнең мәдәни традициясенең мөһим өлешенә әйләнә бара. Төбәктә ата-бабалар мирасын ничек хөрмәт итүләре һәм нинди проектлар әзерләнүе хакында Башкортстан Республикасы башлыгы сөйләде.

Төбәк җитәкчесе сүзләренчә, бәйрәм узган елда гына гамәлгә куелган булса да, инде халык мәхәббәтен яуларга өлгергән:

«Без бу бәйрәмне узган елда гына гамәлгә куйдык, һәм ул инде безнең мәдәни традициябезнең мөһим өлешенә әйләнә», — дип ассызыклады ул.

Бу шедевр белән тагын да күбрәк балаларны һәм олыларны таныштыру өчен, бөтен республика буйлап тантаналы, белем бирү чаралары уза. Аерым игътибар нәшрият эшчәнлегенә юнәлтелгән. «Китап» дәүләт нәшрияты эпосны популярлаштыру белән күп еллар шөгыльләнә, аны туган телдән тыш та бастырып чыгара.

Республика җитәкчесе билгеләп үткәнчә, эш киң колач белән алып барыла:

«Безнең "Китап" нәшрияты эпосны популярлаштыру белән инде күп еллар шөгыльләнә. Ул башкорт, рус, инглиз, француз, кыргыз телләрендә басылып чыкты», — дип хәбәр итте ул.

Классик басмаларыннан тыш, яшь укучылар өчен махсус версияләр дә бар: әкиятләр һәм буяугычлар. Иң якын арада китап кибетләре традицияне заманча технологияләр белән берләштергән яңа басма белән тулыланачак. Башкорт телендә мультимедиа кушымтасы булган «В гостях у Урал-батыра» («Урал-батыр янында») исемле китап дөнья күрергә әзерләнә.

«Телефоннан яки компьютердан уйнарга да мөмкин булачак, фәкать укып кына калмыйча», — дип анонслады төбәк башлыгы.

Мөрәҗәгатен тәмамлап, республика җитәкчесе  әлеге истәлекле дата белән котлады һәм хакимиятләрнең бу мирасны саклау өчен бар көчен куячагына ышандырды:

«Барыгызны да бәйрәм белән котлыйм! Киләсе буыннар өчен искиткеч эпосны саклап калу өчен барысын да эшләрбез», — дип йомгаклады ул.