Яшьләр көнендә яшьләрне ниләр көтә?

«Белем» җәмгыяте «Росмолодёжь» белән берлектә Уфада «Бел, ярат, горурлан, арттыр» дигән Бөтенроссия фестивале кысаларында интерактив мәйданчык оештыра.

Уфада Агыйдел елгасы ярында мәгърифәт зонасы ачылачак, анда республика яшьләре:

– Акмулла исемендәге БДПУ доценты Элина Сафина оештырган «ВыбиРАЙ» уен сессиясендә катнаша алачак. Бу уникаль формат психологияне, эмоциональ интеллектны һәм тере аралашуны берләштерә.

– Яшьләр эмоциональ интеллектны диагностикалаганнан соң, иҗади сәләтләрне ачуга ярдәм итүче импровизация буенча тренингларда катнаша алачак.

– Практик мастер-классларда беренче ярдәм күрсәтү осталыгына өйрәнә алачак.
– Бүгенге көндә аралашу мөһим роль уйный, үз хисләреңне һәм якыннарыңның хисләрен аңлау кешенең җәмгыятьтә үз урынын табуы өчен кирәкле шартка әйләнә, – дип билгеләп үтте Элина Сафина.

Онлайн-трансляцияләр һәм кунаклар

Пермь, Омск һәм Мәскәүдә «Белем» җәмгыяте «Бел» дигән мәйдан оештыра, анда мәктәп укучылары, студентлар һәм яшь белгечләр җәмәгать фикере лидерлары, мәдәният, спорт, сәнгать һәм медиа өлкәсе вәкилләре белән очрашачак. Иң кызыклы дискуссияләрнең онлайн-трансляцияләрен «Белем» җәмгыятенең ВКонтактедагы төп битендә карау мөмкин булачак.
Яшьләр көне алдыннан, 23 июньдә, «Бүген киләчәк ясала: Россиядә синең мөмкинлекләрең» дигән мастер-лекцияләр сериясе башлап җибәреләчәк. Җәмәгать фикере лидерлары яшьләргә үз-үзеңне тормышка ашыру мөмкинлекләре – волонтерлыктан һәм иҗаттан алып спортка һәм дәүләт идарәсенә кадәр – турында сөйләячәк. Яшьләр үзләренә үсеш өчен программалар һәм проектлар ачу, фикердәшләр табу һәм ил буйлап сәяхәт итү мөмкинлекләре турында беләчәк.

– Безнең яшьләр бик актив, сәләтле һәм амбицияле. Алар еш кына җаваплылыкны үз өстенә ала, проектлар башлый, фәнне үстерә, үз бизнесларын алып бара. Бу – чын, эшчән патриотизмның чагылышы. Бүген безнең илдә яшьләрнең потенциалын ачу, профессиональ үсү һәм югары нәтиҗәләргә ирешү өчен барлык шартлар һәм мөмкинлекләр бар. Мин һәр яшь кешенең шуны белүен телим: Россиянең «Белем» җәмгыяте һәрвакыт янәшәдә булачак, юнәлеш бирер, зур казанышларга юл ачар өчен илһамландырыр! – диде «Белем» җәмгыятенең генераль директоры Максим Древаль.

Чыганак: «Белем» җәмгыятенең матбугат хезмәте.