Гафу үтенү көне

4 март христианнарның “прощеное воскресенье”, ягъни гафу үтенү көне булып санала. Христиан булмаган халыкларда да бу көнне гафу үтенү гадәтен очратырга мөмкин. Кылганнарың өчен гафу үтенә белү бар милләт һәм дин кешесенә дә хас. Италиядә яшәүче Рәмзия Шәрәфетдинова бу уңайдан бер шигырь дә иҗат иткән.

КИЧЕРЕГЕЗ МИНЕ

Гафу сорыйм әле бүген

Барлык адәм затыннан.

Балалардан, олылардан,

Бар ирдән, бар хатыннан.

Кичерегез мине берүк,

Тынычлансын күңелем.

Аңлагыз һич бер гөнаһсыз

Яшәү мөмкин түгелен.

Белмичә хата ясала,

Төрле хәл бар һәр эштә.

Ни булса да, кичерегез,

Гөнаһсыз тик фәрештә.

Кемнең язган хатларына

Җавап яза алмадым,

Кемдер артык ялынса да,

Яннарында калмадым.

Кичерегез, кайсыгызның

Тәкъдимен кире кактым,

Кайсыгызның кызып китеп,

Сурәтен утка яктым.
Кичерегез, кайсыгызга

Кунаккка кергәләдем...

Үзем дә бит кайсыгызның

Гөнаһын күргәләдем.

Кичерегез, бүләкләргә

Каршы бүләк бирмәдем.

Рәхмәтем чиксез булса да,

Аны әйтә белмәдем.

Кичерегез мине бүген,

Гафу итегез берүк!

Ходай да мине ярлыкар

Сез кичергәнне күреп.

Фото: infourok.ru