Ура! Каникуллар дәвам итә!

Коронавирус пандемиясе аркасында Башкортстанда мәктәп укучыларының көзге каникуллары 9 ноябрьгә кадәр озайтылды. 1 ноябрьдән югары уку йортларының I курс студентлары һәм магистрантлары да дистанцион рәвештә белем алуга күчәчәк.

Башкортстан Хөкүмәтендә узган коронавирус пандемиясе таралуга юл куймау буенча оператив штаб утырышы йомгаклары буенча көзге каникулларны 9 ноябрьгә кадәр озайтырга карар ителде. Шулай итеп, республика мәктәпләре укучылары бер-берсе белән аралашмыйча өч атна ял итәчәк.

Мәктәп укучыларының ял вакытын озайту тәкъдиме белән Сәламәтлек саклау, Мәгариф һәм фән министрлыклары һәм “Роспотребнадзор” җитәкчеләре чыккан.

Укучылар каникулларга, СOVID-19га бәйле хәл начарлану сәбәпле, гадәттәгедән бер атнага иртәрәк, 17 октябрьдә үк киткән иде. Алар киләсе пәнҗешәмбедә, ягъни 5 ноябрьдә, укырга кайтырга тиешләр иде. Хәзер исә укучылар атна ахырына кадәр ял итәчәк. Алар өчен дәресләр дүшәмбе, ягъни 9 ноябрьдә башланачак.

«Без инкубация чорын өзәрбез дип өметләнәм, һәм безнең балалар мәктәпкә чирләмичә йөри алачак», – дип ассызыклады Радий Хәбиров.

Шуны да өстик, 1 ноябрьдән югары уку йортларының I курс студентлары һәм магистрантлары да дистанцион рәвештә белем алачак. Моңа кадәр алар югары уку йортларының үзләрендә укый иде. II – IV курс студентлары дүшәмбедән Уфага килеп, көндезге рәвештә белем алуга күчәргә тиеш булса да, әлегә бу датаның кичектерелүе ихтимал. Мәсьәлә киләсе атнада хәл ителергә тиеш.

Фото: stihi.ru